صوت من الميدان

كرهتك أد ما حبيتك سنين وسنين
واد ما غنيتك فى أغانى الصبر والمواويل
واد ما اتغزلت فيكى فى ليل طويل
واد ما غنيتك نشيد الصباح فى المدرسة
واد ما دعيتلك يحفظ ربى وتكونى دايما كويسه
كرهتك لما كرهتينى فيكى
لما علمتينى ابقى حجر وأقسى عليكى
كرهتك لما فسدتى وعذبتينى
كرهتك لما فى عينى موتى وخلتينى أبكيكى
لما عطشتينى وبعد شوقه بالذل روتينى
لما جيتك وخبط بابك وقولتلك
أنا جاى أخدمك
ولاقيت جواكى غريب ومن على بابك طردتينى
ياريتك بالذوق مشتينى
لا دا انتى ذلتينى وبهدلتينى

شوفت فيكى العذاب ألوان وساكت
حقى مهضوم فى البطون وساكت
ومالى متخزن فى البنوك ومش باسمى وبردو ساكت!!
ويوم ما اتكلمت جات دبابة ومدرعة وعليا داست
الدنيا اتقلبت قعدت وهاجت وهاصت
ولأول مره بنتكلم لا الناس كشت ولا خافت
والمصرى ثار ورجع مواطن صح وتمام
مش هسكت عن حقى تانى ايوه هتكلم ايوه يسقط النظام
ايوا كفايه ظلم كفاياكم بقا حرام

واما كانوا يسألونى عن حالى اقول كويس
كنت عشانك يا سمرا بتحمل
عشانك بس سكت وانا فى عز الأه وبتألم
لاجل ما يحزنك صوتى ولما اصرخ بعلو صوتى
لاجل ما تبكى لما تشوفى جروحك وسط ضلوعى
لاجل ما تشوفى مكان سوط جلادك على ضهرى
لاجل ما يشهد عليكى فى السما شمسى وقمرى
واتحملــــــــــــــــــت
مجنووووووون ايوه واتحملت
لاجل ما اشوفك حزينة ولا اشوف مره دموعك
انا ابنك وهفضل عاشق ترابك وهفضل تحت طوعك
بس ياريت تحسى بيا شويه
قبل ما ينفذ صبرى وغصب عنى تهنى عليا
مش كفاية كانوا هيسرقوا ثورتى ويضحكوا عليا
والغُرب قال صعبان عليهم وهما اول ناس شمتواا فيا
يا وطنى نفسى أحس انى ليا قيمة عندك وان ليا ديه
ليه شايفانى وسمعانى بصرخ ادامِك ومش حاسه بيا
نفسى تاخدينى فى حضنك وتحسسينى بحبك وتقوليلى حقك عليا
عارفه هى كلمة بس متعرفيش هتعمل ايه فيا !!
علمونا واحنا صغيرين
" احترام الكبير والعطف على الصغير"
انتى معطفتيــــــــــش ........ !!
بس أنا ... هحترمك !!

ولاجل ما يشمت فينا الغيرهديكى فرصة تانيه
علشان بحبك ولسه باقى عليكى يا مصر يا غالية
ولأنك أرضى وسمايا وهوايا وأمى وأم الدنيا
وبينى وبينك الأيام ...
وبينى وبينك ... الميدان