مجـــرد نــــزوة !

كنت ناسية أو بحاول أنسى انى

كنت يوم من الأيام بحبك

وكنت روحى وكنت عمرى

وكنت حتة جوا منى

وكنت جوا عينى الننى

...

كنت جوا الليل نجومى

كنت بسهر فيك بفكر

والقمر يقولى قومى

كنت شمسى وكنت ضلى

كنت بعشق فيك كأنى

كنت روحى اللى رايحه منى

...

كنت بجيلك قبل معادنا

وأنسى الدنيا وأنسى بعادنا

وأقطف وردة ولبسى جديد

زى الطفلة فى يوم العيد

واجرى عليك ...

.....

كنت بحبك حب جنون

كنت بسيرتك أنام وبقوم

وياما عشان جم ولمونى

وياما عشانك اتحملت اللوم

....

كنت بحبك بعشق عينك

بتوه فى سوادها كأنى شريدة

وكنت برغم قربى منك

وكنت برغم حبى ليك

كنت بحس كأنى وحيدة

عايشة معاك وفى نفس الوقت

فى دنيا غريبة

...

كنت بحاول أفهم منك

بس ألاقينى ببعد عنك

كنت بخاف أقولك خايفة

كنت بخاف تقسى عليا

كنت بحاول أدارى دموعى

أنسى همومى

يوم ما تجينى وتلمس ايدى

انسى ظنونى

...

أتارى قلبى كان حاسس

كان عارف

حاول يقولى انه شايف

غميت عنيه وكملت

صميت ودانى ولا سمعت

ومنسحبتش !

وقت وجب الإنسحــــاب

وادينى دلوقتى خسرت !

.........

تسمع منى وتسمع منهم

ومفرقتش عندك عنهم

كنت أتفضل امشى وفكر

أسأل تانى أعرف أكتر

تعالى أسألنى كنت أتكلم

واخترت تسكت وأنا بتألم

وسكاتك خلى الجرح يعلم

...

كنت ظالمنى وانت عارفنى

عارف انى لا يمكن أجرح

أو اعمل حاجة فيك تدبح

دا انا كنت بخاف عليك

يمكن أكتر من نفسى

دا لما قالولى دا قال عليكى وقال

قلت بردو بحبه وبعلو حسى !

وكدبتهم وياريتنى صدقتهم

كنت عرفت بدرى شوية

ووفرت عليك مُدة

بتمثل فيها عليا

.....

كنت جوا حضنى عايش

كنت كل حاجة حلوة

ولا غيرك قلبى شايف

كنت غنوة وسط دوشة

كنت ايد بتفك شنقة !

كنت وانت جمبى عِزوة

ومن اللى فيا عملته

بقولك دلوقتى آسفة

كنت فى حياتى مجرد نزوة !!

التاج دا او بمعنى أصح "تحقيق" جالى وربنا يستر ^^

من كام يوم بعتتلى لولو حبيبتى التاج دا اللى اكتشفت بعد كدا انه ولا تحقيق أمن دولة "الله يرحمهم" :D
سوف نجاوب وربنا معانا بقا انا عارفة ان لولو بتحبنى وهتعزنى اوى فى الأسئله دى !!
:D :D
بسم الله
*********************************
تاااااااااااااااااااااااج الجزيرة عبيبتى وأوح هارتى يوشا
التاج ده ليكى مخصوص
حبيبتى يا مظبطانى ههه ربنا يستر
معرفش ليه الايام دى حاسة أنى لازم أدى كل صحابي اللي عندهم مدونات تاج الظاهر دى وصيتى ولا أيه ربنا يستر
بعد الشر عليك يا جميل انشاله البطة السودا
:D :D
يلا يلا يلا يلا عشان محدش يقول أننا مأنتخين بعد الثورة ولا حاجة أهو شباب زى الورد وشغالين وبعد أن فعلناها ولله الحمد والمنه بعد أن غنينا كثيرآ أنما للصبر حدود ياحبيبي (حبيب العادلي) فأننا قد أستطعنا أن نثبت له أن صبرنا نفذ وخلصنا علي أمن الدولة وعملنا أمن المدونات نياهاهاهاهاهاهاهاهاهاهاهاها
ولذلك فقد قررت أهدى حضرتك التاج ده وأفتح معاكى تحقيق خش عالباشا
:-s
1_ وطزرونوم ( يعنى أسمك بالعنجليزى)
Aya farouk
يعنى آيه فاروق بالعربى
:D

2_أسم الشهرة اللي صحابك بينادوكى بيه
يويو يوكا يوتا آيتا أيويا أيوى
كتير متعديش هههه

3_ سنك
احم 19 ان شاء الله

4_دراستك
فرقة أولى صيدلة المنصورة

5_مجال شغلك
صيدلـــــة وخليفة علا ان شاء الله هههههه
6_ أسم مدونتك
بنتى حبيبتى هههه
بنوتة مصرية بنكهة عصرية

7_أنتى فتحتى مدونتك دى ليه
عشان استفيد واعرف اكتر واهوالاقى حد يقرألى يعنى مش هفضل اكتب لنفسى كدا كتير
:D

8_هلي فكرتى أنك تقفلي المدونة دى
اممم موصلتش لليأس دا لسا ههه

9_لو جيتى فيوم لاقيتى الباسوورد أتسرق هتعملي أيه
هقعد ادعى على اللى سرقة اللهى يتنشر على حبل غسيل وما يلاقى حرامى غسيل معفن ينزله ههههه
وفى الاخر هضطر أسفةً اعمل مدونة تانيه اهىء اهىء
بعد الشر عليا
:D

10_لو لاقيتى تعليق مالوش علاقة بالبوست اللي كتباه لكنه تعليق قلة أدب وسب في جناب حضرتك هتعملي ايه

ههزأه الأول وبعدين أشيل الكومنت بتاعه وبتاعى واجنور محترم كدهون يعنى ههههه


11_صورتك الرمزية اللي في ملف تعريف المدونة مختاراها علي أى أساس
امم بحسها انا كدا البت اللى بتقطف تفاح دى
:D

12_برجك أيه؟ وهل أنتى متابعة حظك اليوم
انا العذراء بس مش متابعة اوى يعنى

13_أهمية الكومنتات بالنسبة ليكى
بعزها زى عنيا ههه وبعز اى شخص يسيب كومنت بجد بيبقى شخصية محترمة جداا ههه وبيدخل السرور لقلب صاحب المدونة
LOL

14_ أجمل مدونة قولتى عليها واااااااااو غير مدوناتى طبعآ
هههه بدون مجاملة مدوناتك كله تحفه وفى كمان مدونة مورو دى تحفة
ونهال وشوية ناس كدا موش فاكره اسامى دلوقتى
:D

:P 15_مجال الكتابه في مدونتك هل ماشيه في أتجاه معين ولا كوكتيلك
كواتيل على ميدلى
:D :D

:D 16_أتعرفتى علي التدوين أزاى
من وانا فى ثانوى بالصدفة كداهون ههه وبعدين الموضوع كبر معايا

17_أيه البوست اللي بتقولي ياريتنى أكتب واحد تانى في روعته
على المددونات معتقدش كتبت حاجة فذه اوى لكن عالفيس فيه يااااااما هههههه
دايما كومنتاتى روعة
:D

18_لو لاقيتى نقد كتير في مدونتك هل ده هيدفعك لأغلاقها
شوور لأ ممكن اصلح من نفسى لو انا غلطانه فى حاجه واخد اراء وكدا
بس لو نقد بقا غرضه يزهقونى فى عيشتى فهكبر الجمجمة وخلاص
:D
19_الشغل بالنسبالك أيه
شغل ايه لا مؤاخذه انا لسا بدرس اهىء
بس لو قصدك شغل البيت فدا يمثلى كابوس اىء اهىء بردو
ولو قصدك شغل نفسى
أى "بشتغل نفسى"
فا دا بيمثلى كل حياتى
:D :D

20_أيه أسوأ مدونة دخلتيها
اممم ناس مبتدئه كدا متعرفش يعنى ايه مدونة أصلا بس اشطه بكره يتعلموا هههه

21_ ياترى بتقولي عليا أيه دلوقتى في سرك
تعبت من الكتابه وانا اصلا فى ايام امتحانات حراام عليكى
معندكيش اخوات بنات !!
:( :( :(

:/ 22_ياترى تمررى التاج ده لمين

اممم امرره لصاحبتى العثولة اللى اتعرفت عليها مؤخرا
Nahollla
بس هظبطلها الأسئلة بعد الامتحااانات لازم نتوصى بيهااا
:D :D
23_ وأخيرآ هل كان لمدونتك دور في شعلله الثورة :)
اممم والله انا كتبت قصائد وكذا مقال وشاركت على اد ما اقدر
ياريت اكون عملت حاجة ! بس مش شعللة يعنى ههههه

علي الله بقي تحمرقي ولا تاكلي سؤال ولا تطنشيه عشان أقصف رقبتك وأخيرآ رغم أنى أعرفك من فترة مش كبيرة قوى بس بجد أنا حاسة أنك من البنات اللي دخلو عليا حياتى ملوها يعنى بصراحة مالكيش في قالو وقولنا ونقل الكلام وشغل الاطفال ده عشان كده أنا مستخسرتش فيكى وجبتلك التاج من عند الحاجة فيكتوريا ذات نفسها وهى أدتهونى من غير ولا كلمة لما عرفت أنه ليا( واااااااااااااااااااااااااصله) وأخيرآ ليكى منى كل ال love

وانا والله بجد حسيت اننا أصحاب من زماااان لو انى لسا عرفاكى مش من كتير وكمان انتى اكبر منى بشوية صغنونة هههه بس بحبك اوى واتمنى نفضل أصحاب واحلى من ناو كمان
:)
ميرسى يا حبى لييييييييييكى
<3


ليلي الشعينى
مدونة فنانة

***************************************************************
واخيرا خلصت من هذا التااااج كل تااااااااااااج وانتوا طيبين يا بنى آدمين
:) :) :) :)