إنسانة فشيخة !

حياتى دى دراما وأكشن

ورومانسي من دقة قديمة

انا باخد وقتى فى الحالة

مش بقلب وبغير فى السيرة

لما أضحك بضحك بضمير

وفى حزنى أنا ببقى كئيبة

وبخلص 100 علبة منديل

وفى غضبى إعصار كاترينا

انا فى عز الفيلم الكوميدى

بعيط على حاجة غريبة

وساعات لو مشهد مآساوى

انا بضحك ضحكة مريبة

أنا باخد على خاطرى بسرعة

وبغمزة تتفك التكشيرة

انا ساعات بكون مجنونة

انشاله أبات فى التخشيبة

انا شوفت كتير فى حياتى

معتش بقا فى صدمة شديدة

والدنيا دى اكبر مقلب

مظنش بقا فى حاجة جديدة

المشهد بتعاد ميت مره

فأنا قررت انى ابقى سعيدة

وكأن الضحكة من جوا

ودى أصلا بسمة تفاريحه

وبتكلم عادى وبهجص

لأ وساعات ببقى أبيحة

انا رقة معجونة أنوثة

وممكن أقلب شبيحة

أنا بعمل يجى مليون حاجة

أنا أصلاً إنسانة فشيخة !

xD

آيـــــــــــــه فـــــاروق ^_^

ست الحسن

مش لاقى اللى أحكيله ويسمعنى

كل ما أتوب وأرتاح يومين

شوقى ليكى يرجعنى
وفى عينك حاجة بتمنعنى
اجيلك تانى ولا امشى
ارحمى قلبى الى مبينمشى
طول بعدك معذبنى
وشوقى ليكى مبرحمشى
ولو بُعدى قساكى
وجواكى حاجة منعاكى
بصى فى عينى وقوليلى
دا جوا العين ميسترشِى
انا غلبان وفارد نفسى من برا
لكنى بحبك
وهواكِ مالكنى من جوا
ويجرحنى تمدى اديكى

تنجدنى
وترجعى تقولى
أنا حُره !

....

يا ست الحسن وأميرتى

نفسى أزور أنا قصرك

هدور حواليكى وأعمل زار

وأدعى انى أنول وصلِك

خانى كلامى واستسلمت

دا كلام القلب أكيد واصلك

..

أقولك ايه

يلى فى سِحرك غجرية

وفى جمال عودك

زهرة بستان شامية

وفى هزة خلخال قدمك

عملتى أحلى أغنية

أقولك ايه

وحروف اسمك بتتمختر على الشفة

وأقول الآه وأستنى تجاوبينى

تطول الآه وفاردلك أنا الكفة

شحات غرامك رجليا دابت

خدت فى ساحتك ميت لفة

وكل ما أقول خلاص هتلين

قوام تميّلى الدَفَة

..

طب أعمل ايه وكل ما فيكى

شاددنى

ومهما قسيتى عالغلبان

حاسس قلبك مكتوبلى

يا ست الحسن والقارة

شبعت أدادى وأتحايل

وقلبى يعيدلك الكَرّه

وكل ما اقول خلاص هوصل

تشوطى فى قلبى قوام بره

يا ساكنة القلب والننى

أنا إنسان ومش جنى

ومش حمل تصدينى كمان مره

أنا مش عبدك

ومش انتى لوحدك الحرة !

آيـــه فاروق