خليك فى حالك .... بس مش أوى يعنى:D !!!
.......................................................................
طبعا كلنا عارفين ان احنا كشعب مصرى بنموت فى حاجة اسمها "نحشر نفسنا فى اللى ملناش فيه!!" يمكن دى طبيعة فى البشر إن عندهم حب المعرفة وحب الإستطلاع والفضول الزايد أحيانا لدرجة تغيظ !!
المهم إن كل واحد فينا ساعات بتشده حاجات وبيبقى عايز يعرف عنها حاجات أكتر .. لو الحاجة اللى عايز يعرف عنها أكتر دى هتفيده فى حياته أو هترضى فضوله بشكل لائق ..يعنى مثلا أنا عايزه أعرف الطبخة الحلوه دى اتعملت أزاى ؟ أو أختى عايزه تعرف توصل للمكان الفلانى دا ازاى ؟ أو واحده عايزه تعرف عن الماده الفلانيه معلومات أكتر ؟!
مفيش مانع فى الحالات دى إننا فعلا نرضى فضولنا ونحاول نعرف اللى عايزين نعرفه بطريقة كويسه بدام مش بنضر حد ولا نفسنا والسلام .
إنما نيجى للصنف التانى .. للناس اللى بتتغذى فقط على الأخبار المتسربة من بيت الجيران أو سبب خناقة فُلان مع عِلان فى الشارع !! أو البت دى بتعمل ايه ؟ومصاحبه مين؟ وبتروح فين وبتيجى منين؟ والواد دا مرتبط ولا لأ؟ وبيذاكر ولا لأ؟ معجب بأنهى بنت ؟!!
مش عارفة أقول ايه !! يعنى هيحصل ايه يعنى لو بطلنا نحشر نفسنا فى اللى ملناش فيه ليه مش نخلينا فى حالنا بدام هندخل فى حاجة لا تعنينا !!
لو لينا شأن فى الحاجة دى ماشى اتحشر براحتك أو لو تقدر تغير حال بلد بحالها مثلا ماشى اتفضل أنت تشرف !!
بس معظم الأوقات صدقونى أسلم حاجة انك تخليك فى حالك
وأنا اتعلمت كدا بالطريقة الصعبة هههه ! هحكيلكوا على موقف حصل من كام يوم معايا وكل ما أفتكر أضحــــــــــــــك !! وصدقونىعمرى ما هنساه أبدا ههههه !!!
كنا طالعين من الكلية ووقفنا عشان نركب تاكسى وكالعاده وقفنا كتير عما باشا من البشاوات سواقين التاكسى يتكرموا ويتعطفوا علينا ويكونوا راحين الحته اللى احنا راحينها "اصلهم اليومين دول بيبقوا محددين اماكنهم !!ومبيرحوش غيرها لو عملت قرد !!"
وآخر لما زهقت سبت صاحبتى تحاول تشوف هى تاكسى شويه بقا وانا وقفت سرحانه فى اللى رايح واللى جاى وفاجئه وأناواقفه عدى عليا بنت تقريبا فى نفس سننا بس ما شاء الله عاللى عملاه فى روحها يعنى من النوع اللى لما يعدى عليك تقول "دا أحنا مش بنات يا جدعان !!" هههه
بس عماله أقول فى دماغى بس لو تعمل الطرحه كذا والمكياج بتاعها أوفر أوى ومكياج عنيها مش عارفه ماله !! فى جاية تاكسى فاضى فقلت انتهز الفرصة وأحاول أوقفه بس تقريبا عقلى كان لسا شارد
وراحه أقول مكسيم "الحته اللى راحينها " لاقتنى بقول ... مكيااااااااااااااااااج !!!!!
لأ واييييييييييييه !! فى وسط الناس والمحلات وناس رايحه وجاية وأنا بصوت عالى وبكل ثقة مكياااااج
يااااااه طبعا مش محتاجة أقولكم منظرى كان عامل أزاى ولا اللى حواليا كانوا بيبصولى باستغراب ازاى ؟؟ ظنا منهم ان فى حته اسمها مكياج اصلا ههههههههه
وكالعادة بعد كام ثانيه عما استوعبت أنا ايه اللى قلته دا !! جاتلى هستيريا ضحك ومبطلتش ضحك على الموقف لحد ما روحت وكل ما افتكره اضحك لحد يومنا هذا واقول فى نفسى .....
اهو دا أخر اللى يشغل دماغه بحد !!!
خلاصة الكلام .. ليه مش نخلينا فى حالنا !! نركز على نفسنا وبس ولو فينا حاجة عايزه تتغير للأحسن ليه لأ مش نبدأ بينا أحنا؟ ولو قادرين وبكرر لووو قادرين وفى مقدرتنا اننا نغير حاجة مش فينا .. فى حد من اللى حوالينا مثلا أو فى المجتمع اللى عايشين فيه نفسه للأحسن
ساعتها ممكن أقولك ليــــه لأ ؟؟!!
Go ahead be my guest
0 التعليقات:
إرسال تعليق