من غير ملام

 

دفى المشاعر من البرود
ونسها وقت الإحتضار
واقفل بيبان السماح ما بينا
وطفى شموع الإنتظار

معتش فى نقطة رجوع
كل الطرق تحت الحصار
حضرلتلِنا مليون وداع
وحفظِت كلامنا بالسماع
سمعت وعودنا بتتحرق
كام مره وعد بينا ضاع
ملّ الطريق مننا
مليت كلامنا عالورق
أحلامنا كانت كلمتين
بينهم ليالى من القلق
سهران ما بينهم الأمل
يحميها من مر الجراح
والآخر برده بيتسرق
والجاى مش أد اللى راح
فالحسبة طلعت مخرّمَه
شحنات كتيرة شكل بعض
كل ما نحاول نقرب
نلقى برضه مصيرنا بُعد
فا لملم مشاعر مُحبَطَة
معتش ليها مكان تعيش
لملم رفاتها عالورق
الشِعر أحسن من مفيش
حياتنا مش قابلة لسيناريو
بكام ممثل عالأفيش
حياتنا كانت شجرة ثابتة
صابرة لكن متلاقيش
فا عادى لو كتب ليا وكتبتلك
سكوتنا أوحش من الكلام
وكلامنا يمكن عالورق
يغنينا عن تُقل السلام
وكل واحد من طريقه
من غير دموع من غير ندم
من غير ملام.

 

آيـــه فاروق