لو بس تعرف

 

 

لو بس تعرف ..

* * *
لو بس تعرف ان فى غيابك
كل حاجة برفض حضورها
وإن التعود رفاهية يمكن
بعيدة عنى ومش بطولها
وإن السكك معبقة بريحة عبيرك
وأن قلبى لو طال يسافر
لحد عندك وبشوق يجيلك
كان يجيلك !
وأن عقلى مشغول بفكرك
مليون محاولة وبرضه يفشل
انه من قلبى يشيلك
يلى معظم الحضور عندك غياب
ويوم ما أقول خلاص وجاى
بيبقى بينا ألف باب
لو بس تعرف أن البعاد
مش مسافة
يوصفها شِعر بكلمتين
وأن إستحالة تختصر
بُعدك ليالى بنظرتين
وأن الرجا وكُتر التحايل
بيقتل حبة من الكرامة
وكل ما الفجوة اللى بينا بتتسع
معتش ينفعها الملامة
فبلاش تموِتّ حاجة حلوة
كات مابينا ولسا بتحاول تعيش
بلاش أكون وحدى بحاول
وألقى تعبى راح مفيش
عشان بحبك ولسا باقية
فياريت اشوف منك تصرُف
يترجملى كلمة "متخافيش" .

 

آيــه فاروق