ألبوم صور فاضى

عدت بخاف فى كل مرة

يجى النوم يجافينى

أشغل نفسى بميت حاجة

تطير النوم من عينى

أضحك على كام نكتة

وأسمع فى كام غنوة

يمكن ألاقى صوت غيرك

بيشجينى

لا لاقية حاجة تفرحنى

وسهرى عالنت وسرمحتى

وصوت ماما تنادينى

يابنتى كفاية قومى ذاكرى

وصوت أنغام لاهينى

"كل حاجة رافضة بُعدك مش هتفضل هى بعدك .. صعب أصدق "

وأسٍح دموع من عينى

..

هنام أزاى وأنا مش سامعه

صوت نفَسَك

ولما تقولى يا حبيبتى

وأحس ان انا جمبك

هدارى ازاى انا شوقى

واحشنى وقلبى مش طايلك

سواد جفنى من سهرى

هداريه بمكياجى

لكنى ازاى هدارى الوقتى

حيرتى وتوهانى

لا أنا حاسه ان انا عايشة

ولا عارفه حتى اتعود

وهم البعد والفرقة

يوم عن يوم بيتزود

قلبى يمشى شوية عِدل
ويرجع تانى بيحود

أحاول ألون روحى بلون

ألاقى اللون بيتسود

أساوم نفسى عالفرحة

وأخسر بردو كما الأول

كل مادا الحكاية تصعب

خلاص مش هقدر أتحمل

أعيش الدنيا من غيرك !

ملّينى طيب وأنا أكمل ! 

مسحت من البوم صورى
كل صورة حطيتها ليك
لاقتنى عمالة اعيط
وانا بقطع فى التجليد
اصل مخدتش بالى
ان الألبوم بعدك فاضى
ومهما حاولت أدارى فى صِورك
صورتك حاضرة جوا القلب
اصل القلب الميت بعدك
مش بيحوأ فيه الضرب
قلت هدارى الكام براوز
جوا فى اوضتى
وجمب سريرى
قلت انا هرمى الوردا الحمرا
فى كتاب "نزار قبانى"
بس خانتنى رعشة ايدى
قلت وقلت وقلت كتير
انا هتشل من التفكير
عايز قلبى يرضى ببُعدك !
بس ازاى
وهو بينبض بس فى قربك
ولسا كمان بتقول حاولى !
طيب هاتلى قلبى جديد !