يــارب يا غفار
يا خـالقنى من عدم
يا رافع السموات
وناشىء الملكوت
حياتى بحر ذنوب
خايف فى ثانية أموت
ولسانى مش تايب
مع أن قلبى خلاص
أصبح عجوز شايب
ملّ الحياة والناس
مش لاقى ليه ونّاس
إفتحلى بابك تانى
أنا مرمي عالعتَبَه
وإهديلى قلبى يكون
سجادة عالقِبَله
رجعنى صبى بِضحك
والضحكة على وشِى
ارحمنى من عذابى
كفاية ضاع شبابى
اهدينى طريق الحق
وعليه أنا همشى
..
يارب يا غفار
أنا أملى فى الجنة
فأهدينى فى الدنيا
مبقاش غريب الدار
يارب يا مُنَجّى
معرفش كام وقتى
فا يارب لو طوّل
يارب يا مهوّن
متخلنيش أرجع
عاصى كما الأول
والوقت لو قصّر
يبقى كدا أحسن
لكن أنا خايف
عارف أنا مقصّر
فا يارب يا هادى
يارب يا رحمان
يسرلى حب الطاعة
متخليهاش ساعة
ف الآخر انا انسان
فاقد زمام امره
لكن عايش أمله
ف قبره يكون ونسَان
...
آيــــه فـــــاروق
0 التعليقات:
إرسال تعليق