لموا العزال يا ولاد
وقفّلوا الشبابيك
دى الحارة مقلوبة
احتلوها بالمتاريس
كل العيال هاصت
والزفة ناقصة عريس
قالك عريس ميت
طب مين اللى كان قتله
قالك منعرفشى
كنا عالكنبة
بنشوف فى "سى السيد"
وأمينة بتعيط
وهو نازل ضرب
تقوله طب اسمع
بسلامته عامل حرب
ولما خلِص الفيلم
نمنا وغرقنا فى حلم
والحلم كان دموى
قالك مكان حيوى
قالوا يزيدنا الشرف
ياعم جاتكوا القرف
عايشين فى قلب حارات
سايبن حياة الترف
ماسكينلنا الصاجات
رافضين حتى الحرس !
وقمنا من الكابوس
يادوب على نور فانوس
ولسا البحث جارى
ولسا السم هارى
قالولنا هاتوا الشيخ
بالذكر هيداوى
عملى فيها المولى
و80 لفة زار
وفى الآخر
انا اللى حمار
قالى متستعجلش
قلت انا حاضر
بخرنى بالدقنة
أصل الشيطان شاطر
طب وحياة الأوليا
والمرسى أبو العباس
كفاية افتا يا شيخ
وعقلى واخده مداس
يا حاج يا محتاس
قلى انت ابنك فين ؟
يا ساكنك دمع العين
قالى شامم دمه
ومخبى على أمه
معرفش مين قتله
صاحبه شايل همه
وعروسته وافقه هناك
والزفة قالبه سكات
والكل شد عياله
وروح على داره
عريس الحارة مات
عريس الحارة مات
آيـــــــه فاروق
0 التعليقات:
إرسال تعليق