جيتــلى متـــأخر

جيتلى متأخر
طالب يكونلك
جوا قلبى مكان
قلبى مش ملكك
ولا مملوك لأي كان
يعز عليا أشوف فى عنيك
نظرة "انا مِن كان"
فى وقت شدِتِك شايلِك
وأنا صاينِك
ومهما تقولى مش عيزاك
هكون جمبِك
أنا شتّان
..
يعز عليا أشوف فى عنيك
كلام يوجع
أخاف أحِسَك فى يوم مجروح
وبتّدور يامن يسمع
وأكون أنا الجانية عليك
وأخاف أكون حكمت عليك
لو ان فى حُكمى مش هرجع
..
قدَرَك كدا
جيت لواحدة مُستَهلَكَة
لا عاد ياثر فيها حُب
ولا حته حبة سَهوكَة
ستاير قلبى القديمة
دابت ولسه متعلَقة
رافض يقبل يوم بديل
وجدرانه لسه مترّبة
أصل قبلك حَب واحد
ومحبش بعده تانى
كل حته فى قلبى بعده
عايشة على ذكرى وأغانى
وبرغم عدى كتيرعلينا
لساها صورتة متزوقة
..
مقدرش أكدب عليك
وأقول أنا هبقى ليك
وأنا كل حتة فيا مِلكُه
وضع ايـــد
..
يعنى قُصر الحكاية
أنا وأنت ضحايا
لا حُبك ليا راح يشفع
وياريت حُبى ليك ينفع
أنا وأنت مننفعش نكون أحباب
ولا يصحِش دلوقتى
نكون أصحاب
وعشان منطقى جداً
مكنش فى يوم
مكان موجود
ما بين الجنة وبين النار
ولو فضلنا محلَك سر
فادا استعباط واسمه هزار
فعشان أكون معاك واضحة
وصدقنى منيش قاصدة
أكون جارحة
لكن أحسنلك
تكون عارف
ولا سيبشِ روحك سارحة
أنا آسفة !
ملكش يا غالى فى قلبى مكان
ولا روحى مستنية
ولابسة التاج والطرحة
لكنُ ببساطة
العيب مش فيك
أنا اللى بس أنسانة
متعرفشِ يعنى ايه
فرحة

...


آيــه فــاروق

ضحكة حزينة

ماهيش فارقة تبتسم
أو حتى تبكى بصوت
ماهيش فارقة تتوجْع
أو يموتك السكوت
كل حاجة وعكسها
عايزها تلقى ضدها
تلقاك فى النهاية
ماشى جسد مسكون
ما هو كل يوم بيعدى
بيتحكم عليك بالموت

جاية عليا كل ظروفى
وبيونس وحدتى خوفى
اهرب من كل طريق ضلمة
القى الحزن وسط كفوفى
مش بتحجج ولا بتألم
ولا قاصد حتى اتكلم
حتى الكلمة اللى بتتكون
تعلن عصيانها حروفى
والقانى وسط طريق مسدود
لا عارف اخبى ولامستور
والقى الضحكة طالعة حزينة
ووراها كدبة"أنا مبسوط" !